الشياكة تبدأ من الحذاء

2006/03/24
على فكرة حكاية إن "الشياكة تبدأ من الحذاء" حقيقة مش هزار... والدليل على كده إنك ممكن تلبسي طقم زي الفل وشيك جداً وبمبلغ وقدره وفي الآخر تلاقي حاجة تشوه المنظر العام للشياكة دي كلها، وهي إنك مش لابسة "الحذاء" المناسب يعني ممكن نقول إن "الحذاء" هي اللمسة النهائية علشان الشياكة تكمل...
وعلشان تقدري تختاري "الحذاء" المناسب ليكِ، فلازم في الأول تتبعي شوية إرشادات بسيطة هتساعدك كتير لو اتبعتيها وإنت بتشتري:
1. نهاية اليوم هو الوقت المناسب لشراء "الحذاء" وده لأن الرجلين الصبح بتكون أصغر من آخر اليوم... لأن بعد يوم طويل من الحركة الرجل بتتمدد أكتر.
2. لما تيجي تقيسي "الحذاء" اقفي بيه وحاولي تمشي في المحل كذا مرة علشان تشوفي الرجل هتستحمل القالب بتاع الحذاء لما تتمدد فيها ولا لأ، يعني ماتكسليش وتقيسي وإنت قاعدة، لأ لازم تتحركي بيه لغاية ما تتطمني إنه مناسب تماماً.
3. حكاية إن الحذاء بيريح بعد شوية ممكن تكون حقيقية، لكن لو حسيتِ إن الحذاء مش بس ضيق لأ وكمان ضاغط على رجلك يبقى بلاش منه أحسن... وحرام عليكِ فلوسك.
4. "الحذاء" الضيق والمفتوح ممكن يتسبب في تشققات الكعب، علشان كده طبعاً توقفي عن ارتداء الحذاء الضيق، وحاولي تتجنبي المفتوح.. وإن ماكانش، يبقى لازم تبذلي جهد أكبر في العناية بكعب الرجلين عن طريق حمامات المياه الدافئة ووضع الفازلين...
5. فيه ناس كتير قوي عندهم رجل مقاسها أكبر من التانية، ودي حاجة طبيعية وماحدش يتكسف... والحل في الحكاية دي إنك تختاري المقاس الأكبر وتركبي "فرش" للجزمة وكل محلات الأحذية بيعملوا الحكاية دي.
6. "الحذاء" لازم تشتريها بنفسك، يعني ماينفعش تقولي لحد "أنا مقاسي كذا" وهو يشتري ليكِ... وده لأن دايماً بيكون فيه اختلاف من قالب "جزمة" لقالب "جزمة" تانية على حسب المصنع.
7. نصيحة وأنا عارفة إن معظمكم مش هيسمعوها بس هاقولها ورزقي على الله.. يا جماعة "الحذاء" "أبو بوز" اللي هو وشه ضيق ومدبب ده خطر جداً على رجليكِ وبيؤذي الأصابع وعضلات الرجلين.
8. وإنت بتقيسي "الحذاء" البسي الشراب المناسب ليها، يعني لو هتقيسي "جزمة كلاسيك" يبقى تلبسي شراب خفيف "فوال" أو "فيليه" ولو جزمة "رياضية" يبقى شراب "قطني" أما الحذاء "الكاجوال" فبيختلف حسب شكل الحذاء
9. وأخيراً علشان تتأكدي إن "الحذاء" ده مناسب ليكِ وتشتريه وإنت مطمنة اتأكدي من إن مقاس الحذاء مديكِ مساحة تسمح لك بتحريك صباعك الكبير، وفي نفس الوقت يكون كعب رجلك مستقر على كعب "الحذاء".
admin
2006/03/24
مشكوره على مجهودك
mohamed1234
2006/03/24
مشكوره على مجهودك و تحياتي لكي
لوعة الحب
2006/03/24
معاكى حق اختى
kamal-120
2006/03/24
تحياتي و معلومتك صحيحة 100/100 وأنا رهن الإشارة في أية معلومات أخرى لأ نه ميدان عملي
HAMADA_WE BAS
2006/03/25
معلومات جميلة ومفيدة

مجهود رئع
موسى بن الغسان
2006/03/31
مشكوره
لولو
2006/03/31
مشكوره على مجهودك
sweety byby
2006/05/25
مشكورة علي النصائح الرائعة
hlol
2006/05/27
انتوا دايما اللى بتدفعونى للامام بردودكم الحلوة مشكورين كتير اوى